DESKRIPZIOA

Muskiz udalerrian El Pobaleko Burdinola dago: lantegi hidrauliko bat, burdin harria landu, eta mota guztietako lanabesak eta tresnak egiten zituena. Muñatones Gaztelutik eskualdea mendean zuen leinuak eraiki zuen burdinola XVI. mende hasieran, Salazar leinuak, alegia, eta 1965era arte iraun zuen lanean.

Osperik handiena XVII. mende amaieran izan zuen, tailerra handitzearekin batera, azpiegitura hidraulikoa berreraiki zuten garaian. Hala ere, gaur egun ikusgai ditugun hainbat eraikuntza eta makineria XIX. mende amaierakoak dira. Garai hartan, azken olagizonak eginahalean ari ziren, teknologikoki aurreratuago zegoen aro berri batean lehiakorrak izaten jarraitzeko.

Burdinolaren inguruan, produkzio-gune oso bat zegoen antolatuta: olagizonen etxebizitza, irin-errota, ogi-labeak, baratzak eta mendiak, egurrez zein ikatzez hornitzeko.

2004. urtean ateak zabaldu zituenetik, museo bizia da El Pobal; izan ere, Bizkaiko industriaurreko jarduerarik inportanteenetako bi erakusten dira bertan: burdingintza eta errotaritza. Ingurune eder hau bisitatzera Barbadun ibaiaren ertzetara hurbiltzen diren guztiek bi makina hidraulikoak abian ikusteko aukeraz gozatu ahal izango dute.

KOKALEKUA

JARDUERAK

El Pobaleko Burdinolak Bizkaiko iraganeko industria aurreko bi jarduera garrantzitsuenak erakusten ditu: siderurgia tradizionala eta errotaritza hidraulikoa. Museoaren hedapenari esker, bisitariek burdinolak eta errotak inguruko ingurune naturalarekin duten lotura estua ezagutu ahal izango dute (uraren kanalizazioa, lehengaien pilaketa -burdin minerala eta egur-ikatza- edo burdina garraiatzeko bideetarako sarbidea). Museora egindako bisitak gure arbasoen artisau-lanbideak balioesten ditu, gure talde-nortasunaren zati gisa, eta merezi du errespetatzea eta kontserbatzea.

Haizeola bat zuzenean
Deskribapena: El Pobaleko lursailean haizeola bat eraikiko dugu eta antzinako labe honetan burdina lortzen saiatuko gara, mineraletik abiatuta. Arkeologia esperimentaleko jardunaldi honetan gurekin egongo den publiko guztiarekin partekatuko da prozesu osoa.
Datak eta ordutegia: 2023-05-20 11:00etatik 13.30era
Tarifak: Dohainik.
Zelan eman izena? 629 271 516 / elpobal@bizkaia.eus
Informazio gehiago: www.bizkaikoa.bizkaia.eus/elpobal

Ipuinez beteriko ibilbidea erdi aroko Muskizetik
Deskribapena: Ibilaldi hau nagusi eta txikiek Muskizko historiaz goza dezagun pentsatuta dago, Alberto Bargos txangoaren gidari berezia izango dugularik. Muskizko Erdi Aroko lekurik enblematikoenean, Muñatones Gazteluan, hasiko gara eta herriko hainbat leku bisitatzen jarraituko dugu. Honela, Albertok Errege Bideaz hitz egingo digu, behin Santelicesen egondako ospitaleaz, Markesaren Sebea zer den azalduko digu edo El Regatoko ontziolak non zeuden erakutsi baita ere. Horrez gain, geldialdi hauek aprobetxatuko ditugu ipuinak eta kondairak bere ahotik ezagutzeko eta familia osoarentzako paseo hau esperientzia hurbil eta dibertigarria bihurtzeko.
Datak eta ordutegia: 2023-05-21 11:00etatik 13:00etara
Tarifak: Dohainik.
Zelan eman izena? 629 271 516 / elpobal@bizkaia.eus
Informazio gehiago: www.bizkaikoa.bizkaia.eus/elpobal
Hizkuntza: Euskara